Suche
  • P. Roth & G. Dazzi

Il muond inter sün 50 x 1.30: l’ascensur, il spazi e la flexibilited

A Genova il spazi es restret. L’intera cited es inchastreda traunter il mer e l’Apennin. Giò’l port cun tuot ils magazins, vias, grüs e barchas as vezza a melapaina l’ova e scha’s vo cul ascensur sü Castelletto per guarder la cited da suringiò as vezza ün tapet da tets.

Noss figl Zosimo ho managio: «Non si vedono le strade!». E propi, las numerusas giassas, «i vicoli e caruggi», da la cited veglia sun pel pü uschè strettas, cha’s riva tres be a pè u il pü da tuot cun üna vespa. Las giassas sumaglian a chavorgias e scha’s guarda in sü schi’s vezza be üna strivla da tschêl, ils tets dals palazis faun da parisol.


Genova: città affamata di spazio!


Nossa chesa in Via dei Giustiniani, bundant 400 ans veglia, ho set plauns. Nus stains süsom e per giodair la bella vista esa da fer 133 s-chelins. Però, grande lusso, c’è l’ascensore: ün model simpatic chi varegia almain 50 ans süllas cordas.


La cabina es be 50 centimeters largia, 1.30 meters lungia ed ho duos portas. Il prüm esa d’avrir üna porta da fier cun ün giatter e zieva stumpler da la vart ün üsch da lain. Be scha tuottas duos portas sun bain serredas as metta l’ascensur in muvimaint. Quist pratic trabicul, concipieu per maximelmaing trais persunas, nun es be l’expressiun dal spazzi restret e da la dimensiun verticala da Genova, ma eir ün’allegoria per la vita taliauna chi promouva di per di la flexibilited. Access a l’ascensur as ho be cun üna clev. Giosom, scha’s voul ir in sü esa d’evrir la porta cun la barba da la clev in sü e süsom per ir in giò esa d’infiler la clev illa serradüra cun la barba in giò. Logic, varo dit quel chi ho monto las duos serradüras. Per gnir oura stögli giosom stordscher ün pom da fier, süsom però trer vi d’üna falla. Voul dir quatter differents sistems d’evrir üna porta e que illa medema chesa, i’l medem ascensur e cun la medema clev. Uossa am dumandi: Es co gnieu improviso u es precis que la scoula intenziuneda chi promova la famusa flexibilited taliauna? Voul dir be ün Svizzer drouva set dis per chapir il sistem…


104 Ansichten

Tel: 081 353 11 45 | prisca.roth@gmx.ch